भारतमा भयावह बन्दै कोरोना : दैनिक साढे तीन लाखभन्दा बढी सङ्क्रमित थपिँदै
तारकेश्वर १३, वैशाख । भारतमा केही दिनयता दैनिक साढे तीन लाखभन्दा बढी कोरोना भाइरसका सङ्क्रमित थपिने गरेका छन् ।
भारतमा २४ घण्टाभित्र सङ्क्रमण पुष्टि हुने सङ्ख्या अन्य मुलुकको भन्दा अत्याधिक हो । दैनिक ज्यान गुमाउने कोरोना सङ्क्रमितको सङ्ख्या पनि धेरै छ ।
भारतमा कोरोना सङ्क्रमणको अवस्था भयावह बन्दा खुला सीमा रहेको नेपाल सबैभन्दा बढी उच्च जोखिममा परेको छ । जथाभावी अवैध रुपमा हुने निर्वाध आवतजावतका कारण नेपाल कोरोनाको उच्च जोखिममा रहेको हो ।
कोरोना सङ्क्रमण दिन प्रतिदिन बढ्दो अवस्थामा रहँदा भारतमा कामका लागि पुगेका नेपालीहरु धमाधम आफ्नो मुलुक फर्कन थालेका छन् ।
बिना चेकजाँच अवैध बाटोको प्रयोग गर्दै निर्वाध रुपमा भइरहेको आवतजावत रोक्न स्थानीय प्रशासनले सकिरहेको छैन । तोकिएकै नाकाबाट नेपाल फर्कनेहरुमा पनि धमाधम कोरोना पुष्टि भइरहेको छ ।
नाकाबाट फर्कने क्रममा कोरोना पुष्टि हुँदा त्यही अनुसारको सावधानी अपनाउने गरिएको छ । तर अवैध बाटो हुँदै भइरहेको आवतजावतका कारण समस्या जटिल बन्ने अवस्था छ ।
नेपालमा पछिल्लो केही दिनयता दैनिक सङ्क्रमण पुष्टि हुनेको सङ्ख्या बढिरहेको छ । यसको मुख्य कारण तीव्र रुपमा कोरोना फैलिइरहेको भारतसँगको खुला सीमा र त्यहाँबाट हुने निर्वाध आवागमन रहेको बताइएको छ ।
भारतमा पछिल्लो २४ घण्टाभित्र तीन लाख ५४ हजार पाँच सय ३१ जना नयाँ बिरामी थपिए । सङ्क्रमित सङ्ख्या एक करोड ७३ लाख छ हजार तीन सय पुगेको छ । सङ्क्रमितमध्ये एक करोड ४२ लाख ९६ हजार छ सय ४० जनाको उपचार सम्भव भएको छ । उपचार सम्भव भएकाहरु कोरोनामुक्त हुँदै सामान्य जीवनमा फर्किएका छन् ।
२८ लाख १४ हजार पाँच सय ४४ सङ्क्रमितको उपचार जारी छ । उपचाररतमध्ये आठ हजार नौ सय ४४ जनाको अवस्था चिन्ताजनक छ । भारतमा दैनिक मृत्यु हुनेको कोरोना सङ्क्रमितको सङ्ख्या पनि बढिरहेको छ । एकै दिन दुई हजार आठ सय छ जनाले ज्यान गुमाए । हालसम्म मृत्यु हुने सङ्क्रमितको सङ्ख्या एक लाख ९५ हजार एक सय १६ पुगेको छ ।
दैनिक कोरोना सङ्क्रमित र कोरोनाका कारण ज्यान गुमाउनेको सङ्ख्यामा बृद्धि भइरहँदा भारतमा महासङ्कट निम्तिन थालेको छ । सङ्क्रमितले सहज रुपमा उपचार पाउन सकिरहेका छैनन् । अस्पतालहरुमा सङ्क्रमितले सहज रुपमा उपचार पाउन सक्ने अवस्था छैन । मृत्यु भएकाहरुको दाहसंस्कारका लागि दाहसंस्कार स्थलको पनि अभाव हुन थालेको छ ।
विशेष गरेर भारतमा अक्सिजनको पनि अभाव हुन थालेको छ । कोरोना सङ्क्रमितको उपचार भइरहेको स्वास्थ्य संस्थामा अक्सिजन पाउन छाडिएको छ । बिना अक्सिजन सङ्क्रमितको उपचार सम्भव नभइरहेका बेला कोरोना सङ्क्रमित दैनिक बढ्दो अवस्थामा रहेको भारत यतिबेला ठूलो सङ्कट झेलिरहेको छ । सङ्ख्यात्मक हिसाबमा हालसम्म भारत कोरोनाका कारण प्रभावित हुनेमध्ये विश्वकै दोस्रो नम्बरमा रहेको मुलुक हो ।
कोरोनाका कारण सबैभन्दा बढी प्रभावित बनेको मुलुक अमेरिकामा भने सङ्क्रमण केही हदसम्म मत्थर भएको छ । अमेरिकामा हालसम्म मृत्यु हुने कोरोना सङ्क्रमितको सङ्ख्या पाँच लाख ८६ हजार एक सय ४८ पुगेको छ ।
कोरोनाका कारण प्रभावित हुनेमध्ये विश्कै तेस्रो नम्बरमा रहेको ब्राजिलमा पनि केही दिनयता सङ्क्रमण कम हुँदै गइरहेको छ ।
एक करोड ८९ लाख २७ हजार नौ सय ३२ जना उपचाररत रहेकोमा एक लाख १० हजार चार सय ९४ जनाको अवस्था गम्भीर छ । पछिल्लो २४ घण्टाभित्र विश्वमा नौ हजार दुई सय ७० जनाको ज्यान गयो । हालसम्म मृत्यु हुने सङ्क्रमित सङ्ख्या ३१ लाख २१ हजार सात सय ६९ पुगेको छ ।
१३ बैशाख २०७८, सोमबार
