नुवाकोटमा एकैदिन थप ५५ जनामा कोरोना संक्रमण, संक्रमितको संख्या ३०८ पुग्यो
नुवाकोट । नुवाकोटमा एकैदिन ५५ जनामा कोरोना संक्रमित थपिएका छन् ।
स्वास्थ्य कार्यालय नुवाकोटका अनुसार पछिल्लो २४ घण्टामा थप ५५ जनामा कोरोना संक्रमण पुष्टि भएको हो । जसमा ४७ जना पुरुष र ८ जना महिला रहेका छन् ।
थपिएकाहरु विदुर नगरपालिकाका ५३ जना, शिवपुरी गाउँपालिकामा एक जना र किस्पाङ गाउँपालिकाका एकजना रहेको सुचना अधिकारी उत्तमराज खनालले बताए ।
विदुर नगरपालिकाका ४६ पुरुष र ७ महिला, शिवपुरी गाउँपालिकाका एक महिला र किस्पाङ गाउँपालिकाका पुरुषमा कोरोना संक्रमण देखिएको हो ।
यससँगै नुवाकोटमा कोरोना संक्रमितको संख्या ३०८ पुगेको छ । त्यस्तै नुवाकोटमा सक्रिय कोरोना संक्रमितको संख्या एकसय ७० पुगेको छ । निको भएर घर जानेको संख्या एक सय ३७ रहेको छ ।
