मोेटरसाइकल चोरीको बिगबिगी बढ्यो
तारकेश्वर १०, चैत । पछिल्लोसमय मोटरसाइकल चोरीको बिगबिगी बढेको छ । महोत्तरीको बर्दिवासमा सोमबार दिउँसै बर्दिवास वडा नं ६ का प्रेमबहादुर खत्रीको ज ९प ४३७९ नंको मोटरसाइकल बर्दिवास–१ पूर्वचोकस्थित आइएमई कार्यालय अगाडिबाट चोरी भएको छ ।
प्रहरीका अनुुसार चैत महिनामा मात्रै १० भन्दा बढी मोटरसाइकल चोरी भएका छन् ।
दैनिकजसो मोटरसाइकल चोरीको समस्या लिएर मानिसहरु आइरहेको इलाका प्रहरी कार्यालय बर्दिवासले जनाएको छ ।
केहि दिन अगाडी मात्र बर्दिवास–७ का वडाध्यक्ष फाल्गुण सुसलिङले प्रयोग गर्दै आउनुभएको बर्दिवास नगरपालिकाको सरकारी नम्बरप्लेटको मोटरसाइकल बर्दिवास–३ गौरीडाँडाबाट चोरी भएको
थियो ।
चैत लागेपछि मात्र बितेका नौ दिनभित्रै १० भन्दा बढी मोटरसाइकल चोरीका घटना भएका बर्दिवास–७ का वडाध्यक्ष सुसलिङले बताए ।
इलाका प्रहरी कार्यालय बर्दिवासले मोटरसाइकल चोरीका घटना बढेको स्वीकार गरेको छ । प्रहरीकै सक्रियतामा बर्दिवास–३ का रुद्र बोहराको मोटरसाइकल बिपी राजमार्गको खुर्कोटमा भेटिएको छ ।
मोटरसाइकल चोरेर भागेका चोरले प्रहरीले पिछा गरेको छनक पाएर खुर्कोटमा गाडी छाडेर भागेको प्रहरीले जनाएको हो ।
बोहराले आफ्नो मोटरसाइकल पाइसकेका छन् । अन्य मोटरसाइकलबारे खोजी जारी रहेको इलाका प्रहरी कार्यालय बर्दिवासले जनाएको छ । प्रहरीले खोजीकार्य जारी राखेको र गिरोह पत्ता लाग्ने बताइरहेको छ ।
