नगर खेलकुद विकास समिति विदुरको संयोजकमा पनेरु मनोनित

• दिवस ढकाल
• १० चैत्र २०७७, मंगलवार

नुवाकोट १०, चैत । नुवाकोटको विदुर नगरपालिकामा नगर खेलकुद विकास समितिको संयोजकमा उद्धव पनेरु मनोनित भएका छन् ।

आखिल नेपाल फुटबल संघ नुवाकोटका उपाध्यक्ष तथा पिपलटार फुटबल कल्वका अध्यक्ष समेत रहेका पनेरुलाई नगर खेलकुद विकास समिति विदुरको संयोजकमा मनोनित गरिएको हो ।

मंगलबार नगर प्रमुख सन्जु पण्डितको अध्यक्षतामा बसेको विदुर नगरपालिकाको बैठकले पनेरुलाई चयन गरेको हो ।

नेपाल फुटबल संघ नुवाकोटका उपाध्यक्ष रहेका पनेरुले नुवाकोटमा खेलकुद क्षेत्रको विकासमा लामो समयदेखि सक्रिय भूमिका निर्वाह गर्दै आइरहेका छन् ।

विदुर नगरपालिकाले मंगलबार संयाेजक मात्र चयन गरेको र १ महिला सहित ४ सदस्य र सहसंयाेजक तोकिएका छैनन् ।

नगरको प्रत्येक वडामा वडा खेलकुद विकास समितिकाे संयाेजक र १ महिला सहित ३ जनाकाे वडा खेलकुद विकास समिति बन्ने नगर खेलकुद विकास समितिका संयोजक पनेरुले तारकेश्वर अनलाईनलाई जानकारी दिए ।