जन्ती बोकेको जिप दुर्घटना हुँदा एकको मृत्यु, दुलाहा-दुलही घाईते

• तारकेश्वर अनलाईन डेस्क
• १३ बैशाख २०७८, सोमबार

बैतडी, वैशाख १३ गते । बैतडीको पाटनमा जन्ती बोकेको जिप दुर्घटना भएको छ । दुर्घटनामा परी एक जनाको मृत्यु भएको छ भने दुलाहा-दुलही घाईते भएका छन् ।

महेन्द्रनगरबाट दुलही लिएर बैतडीको ग्लाल्लेक आउँदै गरेको सुप्रप ००१ ज ३७७ नम्बरको जिप सोमबार बिहान करिब ५ः५० बजे बैतडीको पाटन नगरपालिका वडा नं ६ स्थित घट्टीखोलामा दुर्घटनामा परेको हो ।

दुर्घटनामा परी मृत्यु हुनेमा दशरथचन्द नगरपालिका–९, ग्वाल्लेकका करिब ५५ वर्षीय देवदत्त जोशी रहेका छन् । मृतक दुलाहाका काका रहेको प्रहरीले जानकारी दिएको छ । दुर्घटनामा जिप चालक तर्कराज जोशी गम्भीर घाईते भएका छन् । दुलाहा दुलही सामान्य घाईते भएको जानकरी आएको छ ।

दुर्घटनाको कारण खुल्न सकेको छैन । घटनाबारे प्रहरीले थप अनुसन्धान गरिरहको बताएको छ ।