उखु किसानले अझै पाएनन् बक्यौता, पुनः आन्दोलन गर्ने चेतावनी
काठमाडौं । उखु किसानले मन्त्रालयमा सम्झौता भएको एक वर्षसम्म पनि बक्यौता रकम नपाएपछि पुनः सरकारको ढोका ढक्ढकाएका छन् ।
उनीहरुले छठ पर्वअघि सम्पूर्ण रकम भुक्तानी नभए मङ्सिर २७ गतेबाट काठमाडौं केन्द्रित आन्दोलनको चेतावनी समेत सरकारलाई दिएका छन् ।
आइतबार उद्योग, वाणिज्य तथा आपूर्तिमन्त्री लेखराज भट्टलाई अल्टिमेटमसहितको स्मरण पत्र बुझाउँदै उखु किसानहरूले काठमाण्डौ केन्द्रित आन्दोलनको चेतावनी दिएका हुन् ।
उखु किसान सङ्घर्ष समिति सर्लाहीका संरक्षक राकेशकुमार मिश्रले किसानमाथि अन्याय हुँदा पनि सरकार मूकदर्शक भएको भन्दै आन्दोलनमा जानुको विकल्प नभएको बताए ।
सरकारले बेवास्ता गरे मङ्सिर २७ पछि माइतीघर मण्डलामा भेला भएर आन्दोलन गर्ने तयारी कृषकको छ ।
मन्त्री भट्टले भने बन्द भएका उद्योगको जायजेथा बेचेर भए पनि किसानको रकम दिलाउने प्रतिबद्धता व्यक्त गरे । यसअघि एक वर्ष अगाडी नै कृषकले काठमाडौं आएर लामो आन्दोलन गरी सम्झौता गरी घर फर्किएका थिए ।
